Framboðskynning Hrafnhildar Sigurðardóttur

Kæru SÍM félagar og vinir.

Á aðalfundi SÍM þann 24. mars næstkomandi er komið að kosningu formanns SÍM, þar sem kjörtímabili mínu frá 2010-2012 er að ljúka. Þessi tvö ár hafa verið fljót að líða og eru mörg þau málefni sem stjórn SÍM hefur fylgt hvað fastast eftir við það að ná lendingu. Ég vonast því til að geta haldið starfinu áfram fyrir hönd allra myndlistarmanna á næsta kjörtímabil 2012-2014 og óska eftir stuðningi þínum til þess.

Það eru mörg spennandi málefni í farvatninu og af nógu að taka í hagsmunabaráttunni. Þar má t.d. nefna mál í samstarfi við BÍL s.s. þrýsting á að innanríkisráðherra endurskoði lottópottinn, og að fá leiðréttingu á lögum um virðisaukaskatt. Jafnframt samstarf við Myndstef um að fá Reykjavíkurborg til samninga við myndhöfunda um myndbirtingar á netinu. Endurskoðun á skattamálum listamanna er ofarlega á lista sérstaklega er viðkemur atvinnuleysis- og fæðingarorlofsgreiðslum sem og hlutur myndlistarmanna í heildarpotti starfslaunum listamanna.

Félagsstörf
Reynsla mín af stjórnarsetu er orðin nokkuð löng. Samhliða því að starfa sem myndlistarkona hef ég gegnt margvíslegum stjórnunarstörfum fyrir SÍM, og aðildarfélag þess Textílfélagið í gegnum árin. Fyrir utan formennsku síðustu tveggja ára sat ég í fulltrúaráði SÍM 1993-1994 og stjórn þess 1994-1996 og fyrir hönd þess í dómnefnd Listskreytingasjóðs 2004-2006. Eins sat ég í stjórn Textílfélagsins frá 1993-1995, fyrir hönd þess í Form Ísland 1992-1995, og í ýmsum nefndum félagsins frá 2000-2005. Ég hef einnig setið í stjórn annara félaga og sjálfseignarstofnana og t.d. verið ritari bæði AFS-skiptinemasamtaka og Textílseturs á Blönduósi.

Nám
Auk náms í MHÍ árin 1982-1986 í textíldeild og 1997-1998 í skúlptúrdeild, útskrifaðist ég með MFA gráðu úr skúlptúrdeild CU-Boulder í Colorado árið 2000 eftir tveggj ára nám. Í ársbyrjun 2008 útskrifast ég með Diploma í stjórnun (MPA), með áherslu á menningar-stjórnun og stjórnun félagasamtaka. Síðan þá hef ég lokið síðustu áföngunum til fullgilds meistaraprófs í Opinberri stjórnsýslu(MPA) og geri ráð fyrir að útskrifast að ári, með auka diploma í kynjafræðum.

Formennska 2012-2014
Ég hef ákveðið að gefa kost á mér í formannsembætti SÍM fyrir kjörtímabilið 2012-2014, en aðalfundur SÍM verður haldinn laugardaginn 24. mars 2012 kl.13 í húsnæði Listaháskóla Íslands að Skipholti 1.
Í þeim kosningum vonast ég eftir þínu atkvæði til að geta unnið með stjórn SÍM að áframhaldandi hagsmunabaráttu til handa myndlistarmönnum í landinu og farsælum lausnum á þeim málefnum sem eru efst á baugi þessa stundina.

Með góðri kveðju


Hrafnhildur Sigurðardóttir


Síða Hrafnhildar á Facebook
Stuðningssíða Hrafnhildar á Facebook
Blogg: hrafnhildursig.blog.is
Persónulegur vefur: hsig.net
Kynning á vef SÍM
Vefur Neslistar listamiðstöðvar

(Framboðsyfirlýsingin frá formannskosningunum 2010)

Fossagata 4,
101 Reykjavík
Sími 562-0051 / 848 6051
hrafn29@hotmail.com

  Hrafnhildur Sigurðardóttir's run for President of SÍM – The Association of Icelandic Visual Artists

Hrafnhildur has decided to ask SÍM members for renewed support to continue as president of SÍM, for the coming term of 2012-2014.